تہران:ایرانی وزارت خارجہ کے ترجمان اسماعیل بقائی نے امریکا کے ساتھ جاری جوہری مذاکرات کو بے معنی قرار دیتے ہوئے کہا ہے کہ واشنگٹن کی دوغلی پالیسیوں نے بات چیت کی اہمیت ختم کر دی ہے۔
ترجمان نے کہا کہ امریکا ایک طرف مذاکرات کے دعوے کرتا ہے جبکہ دوسری جانب اسرائیل کو ایران پر حملوں کی اجازت دیتا ہے۔ ان کا کہنا تھا کہ امریکی اجازت کے بغیر اسرائیلی حملے ممکن نہیں تھے-
اسماعیل بقائی نے مزید کہا کہ جب تک امریکا دوغلی پالیسیاں ترک نہیں کرتا، جوہری مذاکرات کی بحالی یا ان میں کوئی پیشرفت ممکن نہیں۔
انہوں نے یہ بھی واضح کیا کہ ایران اپنے قومی دفاع اور خودمختاری پر کسی صورت سمجھوتہ نہیں کرے گا اور کسی بھی جارحیت کی صورت میں بھرپور اور مؤثر جواب دینے کی مکمل صلاحیت رکھتا ہے۔
