بالاکوٹ : حالیہ سیلاب سے متاثرہ علاقوں میں پاک فوج کے جوان ایک بار پھر اپنے عوام کے ساتھ کھڑے ہیں۔ امدادی سرگرمیوں کے سلسلے میں پاک فوج کی جانب سے نہ صرف متاثرہ علاقوں میں ریلیف آپریشن جاری ہے بلکہ مقامی آبادی کو طبی سہولیات بھی فراہم کی جا رہی ہیں۔
سیلاب سے متاثرہ عوام کی فوری طبی ضروریات کو مدنظر رکھتے ہوئے پاک فوج نے بالاکوٹ میں ایک مفت میڈیکل کیمپ قائم کیا۔ کیمپ میں عوام کو علاج کی سہولت فراہم کرنے کے لیے ماہر ڈاکٹرز اور تربیت یافتہ طبی عملہ موجود رہا۔
اس میڈیکل کیمپ کے ذریعے 1327 سے زائد افراد کو مفت چیک اپ اور ادویات فراہم کی گئیں۔ان میں 740 مرد، 336 خواتین اور 251 بچے شامل ہیں، جن کا مکمل طبی معائنہ کیا گیا۔
طبی کیمپ میں آنے والے افراد کی اکثریت معدے کے امراض، پٹھوں کے درد، جلدی بیماریوں (خارش) اور سانس کی تکالیف جیسی عمومی بیماریوں میں مبتلا تھی، جنہیں موقع پر ہی مفت ادویات اور ضروری مشورے دیے گئے۔
مقامی آبادی نے پاک فوج کی اس عوام دوست کاوش کو سراہتے ہوئے شکریہ ادا کیا اور امید ظاہر کی کہ اس طرح کی سرگرمیاں مستقبل میں بھی جاری رہیں گی۔
پاک فوج ہمیشہ سے قدرتی آفات کے وقت عوام کے درمیان موجود رہی ہے۔ چاہے وہ زلزلہ ہو، سیلاب ہو یا کوئی اور ہنگامی صورتحال، ملک کے سپاہی ہر حال میں عوامی خدمت میں پیش پیش نظر آتے ہیں۔
