اسلام آباد:پاکستان نے بھارتی وزارت خارجہ کے آرمی چیف سے منسوب بیان کو سختی سے مسترد کردیاہے ۔ترجمان کا کہنا ہے کہ بھارتی بیان غیر سنجیدہ اور حقائق کو مسخ کرنے کی بھارتی عادت کا ایک اور مظاہرہ ہے۔
ترجمان دفتر خارجہ شفقت علی خان میڈیا کے سوالات کے جواب میں کہا ہے کہ بھارتی بیان حقائق کو مسخ کرکے اور سیاق و سباق سے ہٹ دیا گیا ہے۔ ترجمان نے کہا کہ مبینہ ایٹمی بلیک میلنگ کا بھارتی بیانیہ ایک گمراہ کن اور خود ساختہ ہے۔ پاکستان طاقت کے استعمال یا اس کے استعمال کی دھمکی کا سختی سے مخالف ہے۔
ترجمان نے کہا کہ پاکستان ایک ذمہ ایٹمی ملک ہے جس کا کمانڈ اور کنٹرول کا وسیع ڈھانچہ مکمل سویلین کنٹرول میں ہے۔مسائل کے دوران پاکستان نے ہمیشہ تحمل کا مظاہرہ کیا ہے۔
ترجمان نے کہا کہ دہشت گردی کے خلاف پاکستان کی کوششوں کا بین الاقوامی سطح پر اعتراف کیا جاتا ہے۔
تیسرے ممالک کا حوالہ دینے کو بھی افسوسناک قرار دیتے ہوئے ترجمان دفترخارجہ نے کہا کہ یہ بھارت کی سفارتی کمزوری اور غیر ضروری طور پر دیگر ممالک کو ملوث کرنے کی ناکام کوشش ہے۔
ترجمان نے کہا کہ بھارت کے جنگی جنون کے برعکس، پاکستان اقوام عالم کے ایک ذمہ دار رکن کے طور پر کام کرتا رہے گا۔ ترجمان نے واضح کیا کہ بھارتی جارحیت یا پاکستان کی خودمختاری اور علاقائی سالمیت کی خلاف کسی بھی کارروائی کا فوری منہ توڑ جواب دیا جائے گا۔
