اسلام آباد:وزیراعظم محمد شہباز شریف نے جمہوریت کے عالمی دن (15 ستمبر) کے موقع پر اپنے پیغام میں کہا ہے کہ جمہوریت عوام کی آواز اور عوامی شمولیت کا نام ہے، جو معاشرتی برابری، قانون کی حکمرانی اور قومی اتحاد کو یقینی بناتی ہے۔ انہوں نے کہا کہ 1973 کا آئین پاکستان کی جمہوری ترقی میں سنگِ میل کی حیثیت رکھتا ہے، جو نہ صرف شہریوں کے بنیادی حقوق کا تحفظ کرتا ہے بلکہ صوبوں کو وفاق میں مساوی کردار بھی دیتا ہے۔
وزیراعظم نے کہا کہ پارلیمان جمہوری اداروں میں کلیدی حیثیت رکھتی ہے اور عوامی و قومی مفاد کے لیے قانون سازی کی مجاز ہے۔ انہوں نے زور دیا کہ آئین پاکستان خواتین اور اقلیتوں کی شمولیت، مذہبی آزادی اور نمائندگی کو یقینی بناتا ہے۔
انہوں نے کہا کہ بنیادی حقوق کا تحفظ، آزادی، برداشت اور قانون کی حکمرانی ہی وہ اصول ہیں جن کے ذریعے کوئی بھی ملک اپنے مسائل حل کر سکتا ہے اور موجودہ دور کے چیلنجز کا مقابلہ کر سکتا ہے۔
وزیراعظم نے کہا کہ پاکستان عالمی سطح پر بھی جمہوری اقدار کے فروغ کے لیے کوشاں رہا ہے اور اقوام متحدہ کے تمام معاہدوں اور اصولوں کی پاسداری کرتا رہا ہے۔ انہوں نے کہا کہ پاکستان کا یہ کردار پائیدار ترقی کے اہداف (SDGS) سے ہم آہنگ ہے جن میں امن، انصاف اور مضبوط اداروں کا فروغ شامل ہے۔
وزیراعظم نے اپنے پیغام میں کہا کہ آج کے دن ہم اس عزم کا اعادہ کرتے ہیں کہ عوام، ادارے اور حکومت مل کر جمہوری اصولوں کے تحفظ اور ایک ترقی یافتہ مستقبل کی تعمیر کے لیے مشترکہ کاوشیں جاری رکھیں گے۔
