لاہور: چیئرمین پاکستان کرکٹ بورڈ (پی سی بی) محسن نقوی نے قذافی اسٹیڈیم لاہور کا دورہ کیا، جہاں انہوں نے پاکستان اور جنوبی افریقہ کی ویمن کرکٹ ٹیموں کے درمیان کھیلی گئی ون ڈے سیریز کی اختتامی تقریب میں شرکت کی۔
محسن نقوی نے ون ڈے سیریز جیتنے پر جنوبی افریقہ ویمن ٹیم کی کپتان کو ٹرافی پیش کی، جبکہ پاکستان ویمن کرکٹ ٹیم کی کھلاڑیوں اور کوچز سے ملاقات بھی کی۔ اس موقع پر انہوں نے پاکستانی خواتین کھلاڑیوں کی کارکردگی کو سراہتے ہوئے کہا کہ ٹیم نے زبردست جذبے کے ساتھ کھیل پیش کیا۔
چیئرمین پی سی بی نے مسلسل دو سنچریاں بنانے والی اوپننگ بیٹر سدرہ امین کے لیے 20 لاکھ روپے انعام کا اعلان کیا، جبکہ تمام ویمن کرکٹرز کو فی کس 10 لاکھ روپے انعام دینے کا بھی اعلان کیا۔
آئی سی سی ویمنز کرکٹ ورلڈ کپ کے حوالے سے گفتگو کرتے ہوئے محسن نقوی نے ٹیم کے لیے نیک خواہشات کا اظہار کیا اور کہا کہ بغیر کسی دباؤ کے، بے خوف ہو کر کھیلیں اور آخری بال تک فائٹ کریں۔
انہوں نے مزید کہا کہ کامیابی ہمیشہ ٹیم ورک کا نتیجہ ہوتی ہے، اور قومی ٹیم کی یہی جذبہ، لگن اور اتحاد آئندہ مقابلوں میں بھی کامیابی کی ضمانت ہوگا۔
