کوپ 28 میں کلائمیٹ فنانس پر بہتر موقف کیلئے بھرپور تیاری کریں،نگران وزیر اعظم

اسلام آباد:نگران وزیراعظم انوار الحق کاکڑ کاکہنا ہے کہ موسمیاتی تبدیلی پاکستان جیسے ممالک کیلئے قومی سلامتی کا مسئلہ ہے،کوپ 28 میں کلائمیٹ فنانس پر بہترین موقف پیش کرنے کیلئے ادارے بھرپور تیاری کریں۔

نگران وزیراعظم انوار الحق کاکڑ کے زیر صدارت 28 ویں اقوام متحدہ کانفرنس آف پارٹیز کے حوالے سے بین الوزارتی جائزہ اجلاس ہوا جس میں انہوں نے کہا کہ کوپ 28 میں کلائمیٹ فنانس پر بہترین موقف پیش کرنے کیلئے ادارے بھرپور تیاری کریں۔

وزیراعظم متحدہ عرب امارات میں ہونے والی 28 ویں کانفرنس آف پارٹیز کے یکم اور 2 دسمبر کو ہائی لیول سیگمینٹ میں پاکستان کی نمائندگی کریں گے۔

انوار الحق کاکڑ کا کہنا تھا کہ موسمیاتی تبدیلی پاکستان جیسے ممالک کیلئے قومی سلامتی کا مسئلہ ہے، پاکستان اپنی ماحولیاتی سفارتکاری سے عالمی ماحولیاتی بحث میں مثبت کردار ادا کر رہا ہے۔

وزیرِ اعظم نے کہا کہ پاکستان کا عالمی سطح پر موسمیاتی تبدیلی بڑھانے میں حصہ ایک فیصد سے بھی کم ہونے کے باوجود پاکستان موسمیاتی تبدیلی سے سب سے زیادہ متاثر ممالک میں شامل ہے۔

انہوں نے کہا کہ گزشتہ برس موسمیاتی تبدیلی کے نتیجے میں پاکستان کی ایک تہائی آبادی سیلاب سے متاثر ہوئی، پاکستان کے تمام ادارے تباہ کن سیلاب کے بعد بہترین انداز میں تعمیر نو کا فریضہ سرانجام دے رہے ہیں۔