اسلام آباد: وزیراعظم شہباز شریف نے آزاد کشمیر کی صورتحال پر تشویش کا اظہار کرتے ہوئے اعلیٰ سطح کا ہنگامی اجلاس طلب کرلیاجس میں عوامی ایکشن کمیٹی کے احتجاج سے آزاد کشمیر میں پیدا صورتحال پر غور کیا جائے گا۔
ذرائع کے مطابق وزیراعظم شہباز شریف نے آزاد کشمیر کے معاملے پر اعلی سطح کا اجلاس طلب کر لیا ہے، جس میں آزاد کشمیر کے وزیراعظم سمیت دیگر متعلقہ اسٹیک ہولڈرز بھی شرکت کریں گے۔
ان کا کہنا تھا کہ وفاقی وزیر امور کشمیر امیر مقام، وزیر توانائی، وزیر فوڈ سیکیورٹی بھی شرکت کریں گے اور اجلاس میں وزیراعظم کو آزاد کشمیر کے معاملے پر بریفنگ دی جائے گی، عوامی ایکشن کمیٹی کے احتجاج سے آزاد کشمیر میں پیدا صورتحال پر غور کیا جائے گا۔
ذرائع کاکہناہے کہ وزیراعظم کی زیرصدارت اجلاس میں اہم فیصلے متوقع ہیں، اس کے علاوہ وزیر اعظم شہباز شریف مسلم لیگ (ن) آزاد کشمیر کی پارٹی قیادت سے بھی ملاقات کریں گے۔
ادھر وزیراعظم شہباز شریف نے آزاد جموں و کشمیر کے وزیراعظم چوہدری انوارالحق سے رابطہ کرکے انہیں بھی اپنی تشویش سے آگاہ کرتے ہوئے معاملے کے حل ہونے کی امید ظاہر کی تھی۔
انہوں نے کہا تھا کہ تمام جماعتوں پر زور دیتا ہوں کہ مطالبات کے حل کے لیے پرامن طریقہ کار کا سہارا لیں، انہوں نے کہا تھا کہ قانون کو ہاتھ میں لینے اور سرکاری املاک کو نقصان پہنچانا قطعاً برداشت نہیں۔
وزیراعظم کا کہنا تھا کہ بدقسمتی سے افراتفری کی صورتحال میں کچھ عناصر سیاسی پوائنٹ اسکونگ کرنے میں جلدی کرتے ہیں۔ ڈائیلاگ ، بحث ومباحثہ اور پرامن احتجاج جمہوریت کا حسن ہے، امید ہے کہ معاملہ جلد حل ہو جائے گا۔
وزیرا عظم نے مسلم لیگ ن آزاد کشمیر کے تمام عہدیداروں کو بھی ایکشن کمیٹی کے رہنماو?ں سے بات کرنے کی ہدایت کی تھی۔
