ریاض:وزیرِ اعظم محمد شہباز شریف کی ریاض میں سعودی ولی عہد و وزیرِ اعظم شہزادہ محمد بن سلمان سے خوشگوار ماحول میں ملاقات ہوئی ہے ۔ملاقات میں باہمی دلچسپی کے امور زیر غور آئے۔ پاکستان اور سعودی عرب کے مابین تجارت، سرمایہ کاری اور مختلف شعبوں میں تعاون کے فروغ پر گفتگو ہوئی ۔
ملاقات میں نائب وزیرِ اعظم و وزیرِ خارجہ سینیٹر محمد اسحاق ڈار، فیلڈ مارشل سید عاصم منیر اور دونوں ممالک کی کابینہ کے سینئر ارکان بھی شریک تھے۔
ملاقا ت کے بعد وزیراعظم محمد شہباز شریف نےسوشل پلیٹ فارم ایکس پر اپنے بیان میں کہا کہ انہیں ریاض میں اپنے بھائی ولی عہد محمد بن سلمان سے ملاقات پر بہت مسرت ہوئی۔ ہم نے پاکستان اور سعودی عرب کے برادرانہ تعلقات کو مزید مستحکم بنانے کے عزم کا اعادہ کیا۔ انہوں نے کہا کہ ملاقات میں تجارت، سرمایہ کاری اور اقتصادی تعاون کے شعبوں میں دونوں ملکوں کی تاریخی اور آزمودہ شراکت داری کو مزید وسعت دینے کے طریقوں پر تبادلہ خیال ہوا۔
وزیراعظم نے کہا کہ دونوں ملکوں کی گہری شراکت اور خوشحالی کے مشترکہ وژن کو آگے بڑھانے کے لیے سعودی ولی عہد کے عزم اور تعاون پر شکر گزار ہوں ۔
