نیویارک :وفاقی وزیر اطلاعات و نشریات عطاء اللہ تارڑ نے کہا ہے کہ وزیراعظم محمد شہباز شریف کی جنرل اسمبلی میں تقریر امت مسلمہ کی آواز تھی۔ وزیراعظم نے مظلوم فلسطینیوں کا مقدمہ واشگاف الفاظ میں پیش کیا۔
نیویارک میں میڈیا سے گفتگو کرتے ہوئے وزیراطلاعات نے کہا کہ وزیراعظم کا فلسطینی عوام کے لئے آواز بلند کرنے پر پورا ہال تالیوں سے گونج اٹھا۔ وزیراعظم نے کشمیر کے مسئلے پر بھی پاکستان کا مؤقف ایک بار پھر بھرپور انداز میں پیش کیا۔
وزیراطلاعات نے کہا کہ وزیراعظم نے اپنے خطاب میں پاک بھارت جنگ کے حوالے سے کہا کہ پاکستان کی بہادر افواج نے فیلڈ مارشل سید عاصم منیر کی قیادت میں بھارتی جارحیت کا بھرپور جواب دیا اور فیصلہ کن برتری حاصل کی۔پاکستان کے شاہینوں نے بھارت کے ساتھ لڑاکا طیاروں کو ملبے کا ڈھیر بنا دیا۔
وزیراطلاعات نے کہا کہ وزیراعظم کی تقریر متاثر کن تھی۔ انہوں نے اپنے جامع خطاب میں دہشت گردی اور موسمیاتی تبدیلی سمیت دیگر عالمی چیلنجز پر کھل کر بات کی اور مظلوم فلسطینیوں اور کشمیریوں کی آواز بن کر ابھرے۔
