اسلام آباد: وزیراعظم محمد شہباز شریف نے قطر کے دارالحکومت دوحہ پر اسرائیلی افواج کی جانب سے رہائشی علاقے پر بمباری کو غیرقانونی اور انسانیت سوز اقدام قرار دیتے ہوئے اس کی سخت الفاظ میں مذمت کی ہے۔
سماجی رابطے کے پلیٹ فارم ”ایکس” پر اپنے بیان میں وزیراعظم نے کہاکہ میں پاکستان کے عوام،حکومت اوراپنی طرف سے دوحہ پر اسرائیلی افواج کی جانب سے غیر قانونی حملے اور خوفناک بمباری، رہائشی علاقے کو نشانہ بنانے اور معصوم شہریوں کی زندگیوں کو خطرے میں ڈالنے کی شدید مذمت کرتا ہوں ۔
وزیراعظم نے کہا کہ اس مشکل وقت میں ہماری ہمدردی اور یکجہتی قطر کے امیر شیخ تمیم بن حمد الثانی، قطری شاہی خاندان اور قطر کے عوام کے ساتھ ہے ۔
انہوں نے کہا کہ اسرائیل کی طرف سے جارحیت کا یہ عمل سراسر بلاجواز ہے۔ یہ حملہ قطر کی خودمختاری اور علاقائی سالمیت کی خلاف ورزی ہے۔یہ ایک انتہائی خطرناک اشتعال انگیزی ہے جس سے علاقائی امن و استحکام کو نقصان پہنچ سکتا ہے۔
وزیراعظم نے مزید کہا کہ پاکستان اسرائیل کی جارحیت کے خلاف ریاست قطر اور فلسطینی عوام کے ساتھ بھرپور طریقے سے کھڑا ہے ۔
