پاکستان کا غیر وابستہ تحریک کیساتھ پختہ عزم کا اعادہ

کمپالا: یوگنڈا کے شہر کمپالا میں غیر وابستہ تحریک کے 19ویں سربراہی اجلاس میں ایڈیشنل سیکریٹری خارجہ سید حیدر شاہ نے پاکستان کا قومی بیان پیش کر دیا۔

ترجمان دفترِ خارجہ کے مطابق پاکستان نے غیر وابستہ تحریک کے ساتھ پختہ عزم کا اعادہ کیا ہے۔

پاکستان نے غیر وابستہ تحریک کے بانی اصولوں، امن اور تعاون کے لیے مسلسل حمایت کا اعادہ بھی کیا۔

ایڈیشنل سیکریٹری خارجہ سید حیدر شاہ نے کہا کہ عالمی چیلنجز پر مؤثر بین الاقوامی تعاون سے ہی قابو پایا جا سکتا ہے، پائیدار سماجی و اقتصادی ترقی کے لیے اصلاحات ضروری ہیں۔

انہوں نے مزید کہا کہ ترقی پذیر ممالک میں مالیات، تجارت اور ٹیکنالوجی کی اصلاحات ضروری ہیں۔

ایڈیشنل سیکریٹری خارجہ سید حیدر شاہ کا یہ بھی کہنا ہے کہ مسئلہ کشمیر سلامتی کونسل کی قراردادوں اور کشمیریوں کی امنگوں کے مطابق جلد حل ہونا چاہیے۔