ممبئی:بھارت میں نوجوان لڑکی نے اپنے بوائے فرینڈ کو اہل خانہ کی مدد سے قتل کرکے لاش کے ٹکڑے تھیلے میں ڈال کر پھینک دیا۔
بھارتی نشریاتی ادارے ’’انڈیا ٹو ڈے‘‘ کے مطابق قتل کی یہ ہولناک واردات ریاست بہار کے شہر مظفر پور میں ہوئی جہاں سڑک کنارے ایک تھیلے سے نوجوان کی لاش کے ٹکڑے ملے تھے۔ علاقے میں خوف و ہراس پھیل گیا۔
لاش کی شناخت جے پرکاش کے نام سے ہوئی اور اس کی والدہ سے رابطہ کیا گیا جنھوں نے بتایا کہ ان کا بیٹا ایک لڑکی کے عشق میں مبتلا تھا اور آخری بار 4 مہینے پہلے ملنے آیا تھا۔ وہ لڑکی میرے بیٹے کو کسی سے ملنے نہیں دیتی تھی۔
پولیس نے جے پرکاش کی ماں کی درخواست پر ایف آئی درج کرلی۔ تفتیش میں للیتا کماری نامی لڑکی نے بتایا کہ اس کے 3 سال سے جے پرکاش کے ساتھ تعلقات تھے اور دونوں شادی بھی کرنا چاہتے تھے۔
تاہم جے پرکاش کو شک ہوگیا کہ للیتا کماری کسی اور بھی لڑکے سے بات کرتی ہے جس پر دونوں کا جھگڑا ہوا تھا اور جے پرکاش نے للیتا کی پرائیوٹ لمحے میں بنائی گئی نازیبا ویڈیو کو وائرل کردیا تھا۔
یہ بات للیتا کماری نے اپنے اہل خانہ کو بتائی اور پھر جے پرکاش کو قتل کرنے کا منصوبہ بنایا گیا۔ للیتا نے جے پرکاش کو کزن کی شادی کی بات کرنے کے بہانے مظفر پور بلایا اور اہل خانہ نے بیدردی سے مارا پیٹا۔
جس سے جے پرکاش کی موت واقع ہوگئی۔ لاش کو ٹھکانے لگانے کے لیے اس کے ٹکڑے ٹکڑے کرکے تھیلے میں ڈالا اور سائیکل پر لے جاکر سڑک کنارے پھینک دیا گیا۔
لاش کو سائیکل پر لے جاتے ہوئے مناظر سی سی ٹی وی فوٹیجز میں محفوظ ہوگئی۔ جسے پولیس نے حاصل کرلیا اور اہل خانہ کو بھی حراست میں لے لیا۔
