سندھ حکومت کا آئندہ بجٹ میں ای وی گاڑیوں اور بسوں کی خریداری کا فیصلہ

کراچی: سندھ حکومت نے مالی سال 2025-26 کے بجٹ میں عوامی سفری سہولیات کو مزید بہتر بنانے کے لیے اہم فیصلے کر لیے ہیں۔ سینئر وزیر شرجیل انعام میمن کی زیر صدارت محکمہ ٹرانسپورٹ اینڈ ماس ٹرانزٹ کا اجلاس منعقد ہوا۔اجلاس میں آئندہ مالی سال کے بجٹ میں مزید بسوں، ای وی ٹیکسیوں اور اسکوٹرز کی خریداری کے لیے رقم مختص کرنے کا فیصلہ کیا گیا۔

اجلاس میں الیکٹرک گاڑیوں کے لیے مختلف مقامات پر چارجنگ انفراسٹرکچر قائم کرنے پر بھی غور کیا گیا۔ شرجیل میمن نے کہا کہ سندھ حکومت ماحولیاتی طور پر پائیدار اور جدید پبلک ٹرانسپورٹ سسٹم کے قیام کے لیے پرعزم ہے۔ انہوں نے کہا کہ کراچی کے شہریوں کے لیے ڈبل ڈیکر بسز بھی لائی جا رہی ہیں تاکہ انہیں بین الاقوامی معیار کی سفری سہولت حاصل ہو۔

ان کا کہنا تھا: “ہم چاہتے ہیں کہ کراچی سمیت سندھ بھر کے ہر شہری کو جدید، آرام دہ اور ماحول دوست ٹرانسپورٹ کی سہولیات دستیاب ہوں۔”