راولپنڈی :کور کمانڈرز کانفرنس میں فورم نے اس عزم کا اظہار کیاہے کہ حکومت پاکستان کی جانب سے معیشت کی بحالی کے لیے منصوبہ بند ی حکمت عملی کے اقدامات کی ہر ممکن تکنیکی اور انتظامی معاونت فراہم کی جائے گی۔
آئی ایس پی آر کے مطابق آرمی چیف جنرل سید عاصم منیر نے جی ایچ کیو میں 258ویں کور کمانڈرز کانفرنس کی صدارت کی۔
آئی ایس پی آر کا کہنا ہے کہ فورم نے دہشت گردی کے خطرے کے خلاف مادر وطن کے دفاع میں بہادر سپاہیوں کی مسلسل قربانیوں کو زبردست خراج تحسین پیش کیا۔
شرکاء کو داخلی سلامتی کے موجودہ ماحول کے بارے میں تفصیل سے آگاہ کیا گیا۔
آئی ایس پی آر کے مطابق کور کمانڈر کانفرنس میں کالعدم ٹی ٹی پی اور اس کے دیگر گروہوں کے دہشت گردوں کو پڑوسی ملک میں محفوظ پناہ گاہیں اور کارروائی کی آزادی اور دہشت گردوں کو جدید ترین ہتھیاروں کی دستیابی پر افسوس کا اظہار کیا گیا
فورم میں فوج کی آپریشنل تیاریوں اور تربیتی پہلوؤں پر تفصیل سے غور کیا گیا۔
آرمی چیف نے کہا کہ معروضی تربیت ہماری پیشہ ورانہ مہارت کا خاصہ ہے اور ہمیں اپنی قومی سلامتی کو لاحق کسی بھی خطرے سے نمٹنے کے لیے ہمیشہ تیار رہنا چاہیے۔
آئی ایس پی آر کے مطابق فورم کو حکومت کے اقتصادی بحالی کے منصوبے اور خصوصی سرمایہ کاری سہولت کونسل (SIFC) کے دائرہ کار میں زراعت، آئی ٹی، کان کنی اور معدنیات اور دفاعی پیداوار کے شعبوں میں فوج کے کردار کے بارے میں بھی آگاہ کیا گیا۔
شرکاء نے اس عزم کا اظہار کیا کہ حکومت پاکستان کی جانب سے معیشت کی بحالی کے لیے منصوبہ بند ی حکمت عملی کے اقدامات کی ہر ممکن تکنیکی اور انتظامی معاونت فراہم کی جائے گی۔
