پشاور:کرم میں ڈپٹی کمشنر پر فائرنگ کرنے والے حملہ آوروں کی شناخت کر لی گئی۔
نجی ٹی وی کا سرکاری ذرائع کے حوالے سے اپنی رپورٹ میں کہنا ہے کہ ملزمان کی تعداد 5 ہے جبکہ ملزمان کے علاوہ سہولت کار بھی ملوث ہیں، ملزمان کی شناخت کے بعد کے پی حکومت نے پانچوں ملزمان اور سہولت کاروں کو فوری گرفتار کرنے کا فیصلہ کیا ہے جبکہ دہشتگردوں کے سروں کی قیمت مقرر کرنے کا بھی فیصلہ کیا گیا ہے۔
ذرائع کا کہنا ہے کہ حملہ آوروں کے خلاف مقدمہ درج کر کے گرفتاری اور قانونی کارروائی کی جائے گی۔
اس حوالے سے کوہاٹ میں آج آئی جی پی کی زیرصدارت اہم سکیورٹی اجلاس منعقد ہوگا جس میں آر پی او اور ڈی پی او بھی شرکت کریں گے۔
علاوہ ازایں چیف سیکرٹری خیبر پختونخوا ندیم اسلم چودھری بھی کوہاٹ کا دورہ کریں گے، اہلیان علاقہ اور جرگہ مشران سے بھی ملزمان کی گرفتاری میں مدد لی جائے گی۔
