ای سی سی نے یو اے ای اورپاکستان کے درمیان فریم ورک معاہدےکے لیے کمیٹی تشکیل دینے کی منظوری دیدی

اسلام آباد:کابینہ کی اقتصادی رابطہ کمیٹی(ای سی سی) نےحکومت متحدہ عرب امارات اور حکومت پاکستان کے درمیان فریم ورک معاہدے کے مسودے پر بات چیت کے لیے ایک کمیٹی تشکیل دینے کی منظوری دیدی ہے۔

کابینہ کمیٹی برائے بین الحکومتی تجارتی لین دین کا اجلاس پیر کو وزیر خزانہ اسحاق ڈار کی زیر صدارت منعقد ہوا ۔

اجلاس میں وزارت میری ٹائم افیئرز کی جانب سے پیش کردہ سمری کا جائزہ لیا گیا۔

اجلاس میں بتایا گیا کہ متحدہ عرب امارات کی حکومت کی ملکیت ابوظہبی پورٹس (اے ڈی پی) نےپاکستان انٹرنیشنل کنٹینر ٹرمینل (پی آئی سی ٹی) آپریٹ کرنے میں دلچسپی ظاہر کی ہے۔

کمیٹی نے سمری کا تفصیلی جائزہ لینے کے بعد حکومت متحدہ عرب امارات اور حکومت پاکستان کے درمیان فریم ورک معاہدے کے مسودے پر بات چیت کے لیے ایک کمیٹی تشکیل دینے کی منظوری دیدی یہ کمیٹی دستخط کیلئے معاہدے کے فریم ورک کو حتمی شکل دے گی ۔

متحدہ عرب امارات اور حکومت پاکستان کاانٹر گورنمنٹل کمرشل ٹرانزیکشن ایکٹ 2022 کے تحت دونوں ممالک کے درمیان میری ٹائم سیکٹر میں تعلقات کو مزید مستحکم کرنے کے لیے معاہدے کا فریم ورک تیار کیا جائے گا۔