یورپ سمیت عالمی برادری کو بھارت کی جانب سے سندھ طاس معاہدے کی یکطرفہ معطلی کا نوٹس لینا چاہئے ،پاکستانی پارلیمانی وفد

سٹراس برگ :پاکستان کے اعلیٰ سطح کے پارلیمانی وفد نے کہاہے کہ کہ یورپ سمیت عالمی برادری کو بھارت کی جانب سے سندھ طاس جیسے بین الاقوامی معاہدے کی یکطرفہ معطلی اور من مانی پر مبنی طرز عمل کا نوٹس لینا چاہئے ۔
پاکستان کے اعلیٰ سطح کے پارلیمانی وفد نے سٹراس برگ میں ممبر یورپین پارلیمنٹ اور یورپین پیپلز پارٹی( EPP) کے مشیر برائے خارجہ پالیسی ،مائیکل گہلر(Michael Gahler) کے ساتھ ملاقات کی ۔
دوران ملاقات خطے میں امن و امان کی صورتحال، جمہوری اقدار کے فروغ اور باہمی دلچسپی کے اہم علاقائی و عالمی امور پر تفصیلی تبادلہ خیال کیا گیا ۔پارلیمانی وفد نے بھارت کے جارحانہ طرز عمل کے باعث علاقائی سلامتی کو درپیش شدید خطرات سے آگاہ کیا۔
وفد نے زور دیا کہ یورپ سمیت عالمی برادری کو بھارت کی جانب سے سندھ طاس جیسے بین الاقوامی معاہدے کی یکطرفہ معطلی اور من مانی پر مبنی طرز عمل کا نوٹس لینا چاہئے ۔وفد نے بھارت کی طرف سے انڈس واٹر ٹریٹی کو جنگی ہتھیار کے طور پر استعمال کرنے کے حوالے سے پاکستان کی گہری تشویش سے آگاہ کرتے ہوئے کہا کہ اس طرح کے اقدامات علاقائی ماحولیاتی نظام اور عالمی معاہدات کی سالمیت کیلئے خطرہ ہو سکتے ہیں ۔
پارلیمانی وفد نے واضح کیا کہ پاکستان امن کا خواہاں ہے اور کشمیر سمیت تمام تنازعات کو گفت و شنید کے ذریعے حل کرنے کا متمنی ہے۔