آنجہانی بھارتی اداکار کا عالیشان گھر جلد گرا دیا جائے گا

ممبئی:بالی ووڈ کے لیجنڈ آنجہانی اداکار دیو آنند کا ممبئی میں واقع گھر جلد مسمار کر دیا جائے گا۔

بھارتی میڈیا رپورٹس کے مطابق ممبئی کے پوش علاقے جوہو میں واقع دیو آنند کے عالیشان بنگلے کو مشہور صنعت کار گروپ نے خرید کر اس کی جگہ 22 منزلہ عمارت تعمیر کرنے کا اعلان کیا ہے۔

میڈیا رپورٹس کے مطابق آنجہانی اداکار نے اس بنگلے میں اپنی زندگی کی 40 بہاریں دیکھی تھیں لیکن ان کے اہل خانہ اس گھر میں اب نہیں رہتے اس لئے اسے صنعتی گروپ کو بھارتی مالیت کے مطابق ساڑھے 3 سو کروڑ سے 4 سو کروڑ میں فروخت کردیا ہے۔

تاہم کاغذی کارروائی جاری ہے، جسے جلد مکمل کرکے اس بنگلے کو مسما کردیا جائے گا اور اس کی جگہ 22 منزلہ عمارت تعمیر کی جائے گی۔

میڈیا رپورٹس کے مطابق بنگلے کے عوض ادا کی گئی رقم تین حصوں میں تقسیم کی جائے گی۔ لیجنڈری اداکار کا ایک بیٹا امریکا میں مقیم ہے جبکہ اہلیہ اور بیٹی تامل ناڈو کے ضلع اوٹی میں رہائش پذیر ہیں۔

2011 میں لیجنڈ اداکار دیو آنند لندن میں 88 برس کی عمر میں وفات پاگئے تھے، سوگواروں میں ان کے دو بچے اور اہلیہ ہیں۔