احمد آباد:ورلڈکپ میں جیت کا جشن منانے کے بعد اپنے کمرے میں آرام کرتے ہوئے آسٹریلوی آل راؤنڈر مچل مارش ورلڈ کپ ٹرافی پر پیر رکھ کر بیٹھ گئے۔
سوشل میڈیا پر مچل مارش کی ایک تصویر وائرل ہو رہی ہے جسے آسٹریلوی کپتان پیٹ کمنز نے انسٹاگرام پر شیئر کیا تھا۔
تصویر میں مچل مارش کو ورلڈ کپ کی ٹرافی پر پیر رکھے ہوئے بیٹھا دیکھا جاسکتا ہے۔
تصویر سامنے آنے کے بعد سوشل میڈیا صارفین نے مچل مارش کے اس اقدام کو ٹرافی کی تضحیک بھی قرار دیا۔
یاد رہے کہ احمد آباد کے نریندر مودی اسٹیڈیم میں کھیلے جانے والے آئی سی سی ورلڈکپ 2023 کے فائنل میں آسٹریلیا نے بھارت کو باآسانی 6 وکٹوں سے شکست دی تھی۔
آسٹریلوی اوپنر ٹریوس ہیڈ نے اس میچ میں فتح گر اننگز کھیلی تھی جبکہ مچل مارش 15 رنز بنا کر پویلین لوٹ گئے تھے۔
