حج سیزن کے تمام انتظامات پرسعودی قیادت، حکومت اور عوام کی عازمین کے لئے خدمات قابل فخرو لائق تحسین ہیں ،حافظ طاہر اشرفی

اسلام آباد:چیئرمین پاکستان علماء کونسل و سیکرٹری جنرل انٹرنیشنل تعظیم حرمین شریفین کونسل حافظ محمد طاہر محمود اشرفی نے کامیاب حج انتظامات پر مملکت سعودی عرب کی قیادت کو مبارکباد دیتے ہوئے کہا ہے کہ 2025ء کا حج کامیاب ترین حج ہے ،حج سیزن کے تمام انتظامات بہترین تھے۔ مملکت سعودی عرب ، اس کی قیادت، حکومت اور عوام کی مقدس مقامات اور عازمین حج کے لئے خدمات قابل فخرو لائق تحسین ہیں ۔
عرب میڈیا سے گفتگو کرتے ہوئے حافظ محمد طاہر محمود اشرفی نےکہا کہ اللہ تعالیٰ کے فضل اورخادم حرمین شریفین شاہ سلمان کی سرپرستی اورولی عہد امیر محمد بن سلمان کی قیادت میں مملکت سعودی عرب اورسعودی عوام نے حج کے دوران جو نظم دکھایا اس کی کوئی مثال نہیں ۔ کامیاب حج کےانعقاد پر سعودی عرب کی قیادت ، تمام متعلقہ وزارتوں ، اداروں اور عوام کو مبارکباد پیش کرتے ہیں اور دعا گو ہیں کہ اللہ تعالیٰ مملکت سعودی عرب اور اس کی قیادت کو اسلام اورمسلمانوں کی خدمت کی اسی طرح توفیق عطا کرے۔
انہوں نے کہا کہ جب پوری امت حج کے ان ایام میں مملکت سعودی عرب کی جانب نظریں جمائے ہوئے تھی کہ وہاںسے امت مسلمہ کو درپیش مسائل کے حوالے سے کوئی توانا آواز اٹھے اس پر بھی مملکت سعودی عرب نے امت کو مایوس نہیں کیا۔
حافظ طاہراشرفی نے کہا کہ سعودی عرب کے ولی عہد امیر محمد بن سلمان نے دنیا بھر سے آئے ہوئے حج وفود کے سربراہان کے اعزاز میں خاص تقریب کا اہتمام کیا ، اس تقریب میں انہوں نے فلسطین کے مفتی اعظم اور شام کے وزیر حج کو موقع دیا کہ وہ اپنی بات اس تقریب کے ذریعے پورے عالم اسلام تک پہنچائیں ۔ وہاں فلسطین سمیت پوری امت کے مسائل کا ذکر ہوا۔انہوں نے کہا کہ سعودی ولی عہد امیر محمد بن سلمان کی جدوجہد سے،اوران کی قیادت میں امت مسلمہ متحد ہوگی، مسئلہ فلسطین اور مسئلہ کشمیر حل ہوں گےاور امت کے باقی مسائل بھی حل ہوں گے۔ بلاشبہ امت کی اتحاد و وحدت کا مرکز مکہ اور مدینہ ہیں، وہاں سے جو آواز اہل فلسطین اور مظلوم امت کے لئے اٹھی ہے وہ پوری امت کی ترجمانی ہے۔