راولپنڈی :راولپنڈی اڈیالہ جیل کے قریب میڈیا سے گفتگو کے دوران بانی پی ٹی آئی کی ہمشیرہ علیمہ خان پر دو خواتین نے انڈا پھینک دیا۔ واقعہ داہگل ناکے کے مقام پر اس وقت پیش آیا جب علیمہ خان میڈیا سے گفتگو کر رہی تھیں ۔
عینی شاہدین کے مطابق انڈا مارنے کے بعد دونوں خواتین اپنی گاڑی میں بیٹھ کر فرار ہونے لگیں تاہم موقع پر موجود کارکنوں نے گاڑی کو گھیرے میں لے لیا اور مکے پتھر مارنے سے گاڑی کے شیشے توڑنے کی کوشش کی۔ بعدازاں پولیس نے بروقت کارروائی کرتے ہوئے دونوں خواتین کو حراست میں لے کر اڈیالہ چوکی منتقل کردیا۔
پولیس ترجمان کے مطابق ابتدائی معلومات کے مطابق انڈا پھینکنے والی خواتین کا تعلق پی ٹی آئی سے ہے جبکہ واقعہ اس وقت پیش آیا جب خیبرپختونخوا سے آل گورنمنٹ ایمپلائز گرینڈ الائنس اور آل پاکستان کلرکس ایسوسی ایشن کے مظاہرین اپنے مطالبات کے سلسلے میں وہاں موجود تھے۔ خواتین نے سوالات کے جواب نہ ملنے پر ردعمل کے طور پر انڈا پھینکا۔
واقعے کے دوران شور شرابہ اور ہنگامہ آرائی بھی دیکھنے میں آئی۔ اس موقع پر علیمہ خان نے کہا کہ ہمیں فکر نہیں کوئی حملہ کرے، ہمیں پہلے سے علم تھا ایسے واقعات ہوں گے۔
