کوئی ادارہ الیکشن میں تعاون سے انکار نہیں کر سکتا، پرویز الٰہی

تحریک انصاف کے مرکزی صدرچوہدری پرویز الٰہی نے کہا ہے کہ کوئی سرکاری ادارہ الیکشن میں تعاون سے انکار نہیں کرسکتا ‘ اگرکوئی انکار کرے گاتوذمہ دار براہ راست وزیر اعظم ہوں گے۔پرویز الٰہی سے پارٹی رہنمائوں نے ملاقات کی ۔اس موقع پر گفتگو کرتے ہوئے انہوں نے کہا کہ سپریم کورٹ کے حکم پر پنجاب میں الیکشن کی تاریخ کا اعلان ہو چکا ہے‘شہباز شریف اگر سپریم کورٹ کے حکم پر عملدرآمد میں رکاوٹ بنیں گے تو یوسف رضا گیلانی کی طرح گھر جائیں گے۔ لاہور میںنگران وزیراعلی نے سانحہ ماڈل ٹائون کی خونی تاریخ دہرائی ہے، اس خونریزی کا حساب نگران وزیراعلی کو ہر صورت میں دینا پڑے گا، رانا ثنا اللہ سانحہ ماڈل ٹائون، سانحہ 25مئی اور سانحہ زمان پارک میں براہ راست ملوث ہیں۔وفاقی وزیر داخلہ بہت جلد قانون کے شکنجے میں ہوں گے اور اپنے انجام کو پہنچیں گے، الیکشن کی تاریخ کے اعلان کے بعد پنجاب میں انشا اللہ عمران خان کی حکومت دوبارہ قائم ہونے میں اب کوئی رکاوٹ باقی نہیں رہی۔پی ڈی ایم الیکشن سے فرار کے حیلے بہانے کر کے عملی طور پر اپنی شکست تسلیم کر چکی ہے