اسلام آباد:ایم کیو ایم نے حلقہ بندیوں ، تبادلوں اور تقرریوں پر اپنے تحفظات سے الیکشن کمیشن کو آگاہ کر دیا۔ انتخابات کیلئے لیول پلئینگ فیلڈ کا مطالبہ بھی کیا۔رہنما فاروق ستار نے کہا کہ دو ہزار اٹھارہ کی حلقہ بندیوں پر ہمارے شدید تحفظات ہیں، یہ حلقہ بندیاں درزی بیٹھا کرکی گئیں۔ الیکشن کمیشن نے تحفظات کا ازالہ کرنے کی یقین دہانی کرائی ہے۔
فاروق ستار کی سربراہی میں ایم کیو ایم کا پانچ رکنی وفد ملاقات کیلئے الیکشن کمیشن پہنچا۔ کراچی کی حلقہ بندیوں سے متعلق امور پر تبادلہ خیال کیا گیا۔ وفد نے اپنے تحفظات سے بھی آگاہ کیا۔
میڈیا سے گفتگو میں فاروق ستار نے حلقہ بندیوں پر تحفظات کا اظہار کرتے ہوئے بتایا کہ اپنی مرضی کے حلقہ بندیاں کرکے پہلے مخصوص پارٹی کو فائدہ دیا گیا۔ سکھر اور میرپور خاص میں ہمیں نقصان پہنچایا گیا۔
الیکشن کمیشن سے کہا ہے کہ دو ہزار اٹھارہ کی زیادتی کا ازالہ ہونا چاہیے۔ تبادلے اور تقرریوں پر بھی ہمارے تحفظات ہیں۔ الیکشن کمیشن عام انتخابات کی تیاریاں کررہا ہے مگر سندھ میں انتظامی طور پر لیول پلینگ فیلڈ قائم نہیں ہوئی۔
فاروق ستار نے بتایا کہ نگران وزیراعلی نے یقین دہانی کرائی ہے، اب عمل ہوتا ہے یا نہیں بعد میں پتہ چلے گا۔
