اسلام آباد/مری: راولپنڈی اسلام آباد سمیت گردونواح میں بارش سے موسم سرد ہوگیا جبکہ وادی ناران، کاغان اور مری کے پہاڑوں نے برف کی سفید چادر اوڑھ لی۔
جڑواں شہر وں راولپنڈی اسلام آباد سمیت مضافاتی علاقوں میں جمعرات کی شام سے وقفے وقفے سے بارش کا سلسلہ جاری ہے جس کے باعث سردی کی شدت میں اضافہ ہو گیا ہے ۔
دوسری جانب مری نتھیاگلی ،گلیات،ناران،کاغا ن کے پہاڑوں نے برف کی سفید چادر اوڑھ لی ہے۔
کاغان ڈویلپمنٹ اتھارٹی کے مطابق برفباری کے باعث بابو سرٹاپ جانے والی سڑک بند ہوگئی، سیاحوں کو سفر سے گریز کی ہدایت جاری کر دی گئی، بٹہ کنڈی، جلکھڈ اور لولوسر جھیل پر چار سے چھ انچ تک برفباری ریکارڈ کی گئی، بابو سر ٹاپ پر پھنسے سیاحوں کو ریسکیو کر لیا گیا۔
ڈپٹی ڈائریکٹر کاغان ڈویلپمنٹ اتھارٹی نے کہا کہ گٹی داس کے مقام پر بھی برفباری کے باعث پھنسے سیاحوں کو بحافظت ریسکو کرلیا گیا، مری میں بھی موسم سرما کی پہلی برف باری سے سیاحوں میں خوشی کی لہر دوڑ گئی، مری میں سردی کی شدت بھی بڑھ گئی۔
