نارووال:مسلم لیگ ن کے رہنما ء احسن اقبال کا کہنا ہے کہ اگر معیشت کمزور ہو جائے تو کسی بھی ملک کا اسلحہ اور ٹینک بھی اسے بچا نہیں سکتے، سوویت یونین کی مثال ہمارے سامنے ہے۔طاقت اسلحہ سے نہیں آتی، طاقت مضبوط معیشت سے آتی ہے۔
یونیورسٹی آف نارووال میں پہلی نیشنل ڈاکٹر علامہ اقبال کانفرنس سے خطاب میں مسلم لیگ ن کے رہنما احسن اقبال نے کہا کہ اسرائیل نے ظلم کا بازار گرم کیا ہوا ہے، اس کے پیچھے پورا مغرب کھڑا ہوا ہے، جہاں اس کے دیگر اسباب ہوں گے ان میں بڑا سبب علم سائنس اور ٹیکنالوجی کے اندر بالادستی ہے، مسلمانوں کی علم سائنس میں پستی ہے۔
انہوں نے کہا کہ ہمارے پاس سڑکوں پر نکل کا گاڑیاں توڑنے والے بہت ہیں، ہمارے پاس ایٹم کا سینہ چیرنے والے وہ دماغ نہیں ہیں جن کے ساتھ آج دنیا میں کسی قوم کو طاقت ملتی ہے، آج چاند پر کمند روس، امریکہ اور بھارت ڈال چکے ہیں، کوئی مسلم ملک نہیں ہے جو چاند پر کمند ڈالنے کی صلاحیت رکھتا ہو۔
احسن اقبال نے کہا کہ ہمارے پاس تیل اور معدنیات کی صورت میں بہت سے وسائل ہیں، آج مسلمانوں میں کفر کے فتوے بانٹنے والے تو مل جاتے ہیں لیکن سائنس کی بالادستی کا راستہ دکھانے والے نظر نہیں آتے، جس دن ہم علم بانٹنے والے بن جائیں گے تو کوئی کسی مسلمان پر میلی نگاہ ڈال کر نہیں دیکھ سکے گا۔
ان کا مزید کہنا تھا کہ آج کے دور میں قوموں کا دفاع جنگ کے سازوسامان سے نہیں ہو سکتا، جدید ترین اسلحہ پورے مشرقی وسطیٰ میں بھرا پڑا ہے، طاقت اسلحہ سے نہیں آتی، طاقت مضبوط معیشت سے آتی ہے۔
