راولپنڈی: انسداد دہشت گردی کی خصوصی عدالت نے سانحہ نو مئی کو سرکاری عمارت جلانے کے الزام میں وزیراعلیٰ خیبرپختونخوا سمیت پی ٹی آئی کے دیگر رہنماؤں کو طلب کرلیا۔
انسداد دہشت گردی راولپنڈی عدالت کے جج ملک اعجاز آصف نے وزیر اعلی خیبر پختونخواہ علی امین گنڈا پور، قومی اسمبلی میں سنی اتحاد کونسل کی پارلیمانی لیڈر زرتاج گل،اشرف سوہنا اور مہر محمد جاوید کو سانحہ 9 مئی کے تھانہ کینٹ میں سرکاری عمارت جلانے کے مقدمہ میں طلبی کا نوٹس جاری کردیا۔
عدالت نے مذکورہ رہنماؤں کو 26 جون کو اڈیالہ جیل طلب کیا ہے۔ مذکورہ مقدمے میں وزیراعلیٰ سمیت چاروں رہنماؤں نے ضمانت حاصل کی ہوئی ہے۔
خیال رہے کہ سانحہ9 مئی کے تمام کیسوں کی26 جون کو اڈیالہ جیل عدالت میں سماعت ہوگی اور بانی چئیرمین پی ٹی آئی سمیت تمام ملزمان کو فرد جرم کے لئے مقدمات کے چالان کی نقول تقسیم کی جائیں گی۔
