ڈیووس:فٹبال کے میدان سے پاکستان کے لیے خوشخبری سامنے آ گئی ہے، فیفا کے صدر جیانی انفانٹینو نے پاکستان کے دورے کا اعلان کر دیا ہے۔ ڈیووس میں جاری عالمی اقتصادی فورم کے موقع پر میڈیا سے گفتگو کرتے ہوئے فیفا صدر نے کہا کہ وہ بہت جلد پاکستان کا دورہ کریں گے۔ ان کا کہنا تھا کہ یہ دورہ وزیراعظم شہباز شریف سے کیے گئے وعدے اور پاکستان فٹبال فیڈریشن کی نئی قیادت پر اعتماد کی بنیاد پر طے پایا ہے۔
فیفا کے صدر جیانی انفانٹینو نے کہا کہ پاکستان فٹبال کھیلنے والا ایک عظیم ملک ہے اور یہاں بے پناہ ٹیلنٹ موجود ہے۔ انہوں نے مزید کہا کہ فیفا کی کوشش ہے کہ باصلاحیت کھلاڑیوں کو مواقع فراہم کیے جائیں تاکہ پاکستان کو ایشیا کی صفِ اول کی فٹبال ٹیموں میں شامل کیا جا سکے۔ ان کے مطابق پاکستانی حکومت کی جانب سے کھیلوں کے فروغ کے لیے کی جانے والی کوششیں حوصلہ افزا ہیں اور مستقبل میں اس کے مثبت نتائج سامنے آئیں گے۔
