اسلام آباد:خدمت کی سیاست کا مشن جاری، اسلام آباد میں ایک اور ترقیاتی منصوبہ ریکارڈ مدت میں مکمل ہوگیا۔ وزیراعظم محمد شہباز شریف نے ٹی چوک پر اقبال فلائی اوور اورایکسپریس وے سگنل فری کوریڈور کا افتتاح کر دیا۔
راولپنڈی اور اسلام آباد کے درمیان ٹریفک کے بہاؤ میں روانی یقینی بنانے اور عوام کی سہولت کے لیے بنیادی ڈھانچے کا ایک اور منصوبہ ریکارڈ مدت میں مکمل کر لیا گیا۔ وزیراعظم محمد شہباز شریف نے جی ٹی روڈ کے سنگم پراقبال فلائی اوور کا افتتاح کیا۔یہ اہم منصوبہ 77دن کی ریکارڈ مدت میں ایک ارب چالیس کروڑ روپے کی لاگت آئی ہے ۔
وزیراعظم نے ایکسپریس وے سگنل فری کوریڈور کا بھی افتتاح کیا۔اس موقع پر بریفنگ میں بتایا گیا کہ ان منصوبوں سے اسلام آباد اور راولپنڈی میں جی ٹی روڈ سے داخل ہونے والی ٹریفک جام کا مسئلہ ہمیشہ کے لیے حل ہو گیا ہے ۔وزیراعظم نے ان منصوبوں کا ستمبر میں سنگ بنیاد رکھا تھا ۔
تقریب سے خطاب کرتے ہوئے وزیراعظم محمد شہباز شریف نے منصوبے کی بروقت تکمیل پر وزیر داخلہ ، چیئرمین سی ڈی اے اور ان کی ٹیم کو مبارکباد دیتے ہوئے کہا کہ شفافیت اور معیار کو یقینی بناتے ہوئے آگے بڑھنا ہے ۔ انہوں نے کہا کہ عوامی خدمت کا سفر جاری رکھیں گے ۔
وزیر داخلہ محسن نقوی نےبتایا کہ وفاقی دارالحکومت کی ترقی کے لیے وژن 2027 پر عمل پیرا ہیں ۔ عوامی فلاح کے 134 منصوبے مکمل کیے جائیں گے ۔انہوں نے کہا کہ سپیڈ کے ساتھ شفافیت اور معیار پر بھی پوری توجہ مرکوز ہے ۔اقبال فلائی اوور کے ساتھ سروس روڈز بھی تعمیر کی جائیں گی ۔
