اسلام آباد: ڈپٹی سپیکر قومی اسمبلی سید غلام مصطفیٰ شاہ نے شمالی وزیرستان میں سکیورٹی فورسز کی چیک پوسٹ پر دہشتگردوں کے حملے کی شدید مذمت کی۔
ڈپٹی سپیکر قومی اسمبلی سید غلام مصطفیٰ شاہ نے کہا کہ دہشتگردوں کے حملے کے نتیجے میں شہید ہونے والے فوجی افسروں اور جوانوں کو خراج عقیدت پیش کرتے ہیں، انہوں نے فوجی افسروں اور جوانوں کی قیمتی جانوں کے نقصان پر دکھ اور افسوس کا اظہار کیا۔
ڈپٹی سپیکر نے کہا کہ دہشتگرد انسانیت کے دشمن اور ملک میں امن کو سبوتاژ کرنے کے درپے ہیں، ملک دشمن شرپسند عناصر اپنے ناپاک ایجنڈے میں کبھی کامیاب نہیں ہوں گے، وطن کے دفاع کو ناقابل تسخیر بنانے والے جوانوں کی قربانیوں کو ہمیشہ یاد رکھا جائے گا۔
سید غلام مصطفیٰ شاہ نے مزید کہا کہ دہشتگرد بزدلانہ کارروائیوں کے ذریعے سکیورٹی فورسز کے دہشتگردی کے خلاف غیر متزلزل عزم کو متزلزل نہیں کر سکتے، ڈپٹی سپیکر نے اللہ تعالیٰ سے شہداء کے درجات کی بلندی اور اہلخانہ کیلئے صبر جمیل کی دعا کی۔
